¿Ya nun xela como antes?

   “El que guarda siempre tien” toi fartu de repitilo, y ye una máxima que siguo dafechu. Tolos cuadernos de notes, datos de campu, y mil papelinos con datos o idees, tán al barullu nel mio pupitre. De xemes en cuando dame por revisar toa esa montonera caótica, y siempres atopo daqué d’interés. 

   Va poco, atopé delles notes del númeru de díes de xelada que diba rexistrando a lo primero de vinir a vivir a Bañugues (cuento como día de xelada cuando la temperatura baxa a 0ºC); tenía dellos años guardaos nel ordenador, anque nun cuntaba con esos datos vieyos, polo que la serie hestórica medró de 6 años a 15 (de 2003 a 2017), un númberu de datos col que quiciabes podía facer dalguna cosina.

   Toos tamos fartos de sentir, o hasta de dicilo, qu’agora los iviernos nun son tan gafos como enantes, nun nieva tanto, tampoco xela de duro, nótase tovía más si vives na mariña; pero, ¿ye verdá esto?

   Nesta dómina que pude estudiar los datos baillaron bastante, ye d’esperar cuando trates datos meteorolóxicos, los años con más xelaes fueron 2006 con 16 díes, y 2005 con 15, ye de rescamplar que la mayoría de los años con más xelaes concéntanse na primer mitá de la dómina, datu que ya paez confirmar la idea de que cada vegada xela menos. Pues ver los datos na gráfica que vien darréu, cola media n’encarnao (n=7,4):



   Pero esto nun val, como sabes en ciencia nun se pueden tomar decisiones sofitaes en paeceres, hai que dalgo más, pa  eso ta la estadística. Un análisis percenciellu y que da bon sofitu pa tomar decisiones d’esta triba ye’l análisis de correlación (si sigues el blogue tas fartu de vémelo usar), que podemos aplicar perrápido con cualesquier fueya de cálculu de los programes “d’oficina” al usu.
   Al aplicalu atopé un valor de -0,729, qu’al mirar el nivel de significancia pal númberu de muestra  confirmamos que podemos afirmar qu’el númberu de díes de xelada amenorgó na dómina estudiada, con un percentax d’erru del 1%, o lo que ye lo mesmo tenemos un 99% de posibilidaes de qu’esta merma nun se deba a una coincidencia estadística o a un erru de muestréu.

   Pero la cosa nun finó ehí, suel pasar que cuando retruques una entruga apaécente otres nueves. Ya sabemos qu’en Bañugues les xelaes amenorgaron, pero, ¿n’otros llaos? Pa responder tiré d’hestoricos d’internet, y fui topar con el rexistru de datos d’una estación de Somió (Xixón), que cunté que sedríen bonos pa comparar colos de Bañugues, por tar al mesmo altor. Por ciertu, al mirar si los datos taben venceyaos, atopé una correlación cuasi perfeuta (0,98, cuando’l máximu ye 1 pa una correlación positiva). Los datos vienen xunto colos de mio na gráfica:


   Los datos de Xixón tienen una media más alta (9 dies de xelada por añu de media), pero tamién amenorgaron col tiempu, y col mesmo nivel de significancia (atopé  un valor de -0,717). Nes dos llocalidaes xela menos polo menos desde 2003. 

   Siguimos entrugando,¿y anties d’esto? Como los datos de Bañugues y Xixón tán pervenceyaos, podemos usar los d’una llocalidá pa saber lo que socedió na otra, ensin muncho marxen d’erru. La base de datos de Somió llega hasta 1995:


   Anque los datos baillen muncho tamién, la tendencia ye la de baxar, pues atopé un coeficiente de correlación de -0,561, que pal númberu de muestra ta al mesmo nivel que los análisis anteriores, tenemos el 99% de certeza.
   Con los datos que teo nun puedo llegar más p’allá de dicir que na faza de la mariña de Peñes y Xixón desde los 90 p’acá cada añu xela menos. Que m’alcuerde yo, de neñu xelaba muncho más, pero nun teo datos oxetivos p’aseguralo. Relleendo un llibru que teo atopé una serie más llarga de díes de xelada por añu, de 1971 al 2000, de la llocalidá valenciana de Manises. ¿El resultáu? El mesmo que lo de Xixón y Bañugues (atopé un valor de -0,619, que pa esi tamañu de muestra confirmase la hipótesis con una confianza del 99%):


   Valençia ta perlloñe d’Asturies y tien otru clima, pero nun paez coincidencia que nos dos llaos soceda lo mesmo.

   Yo nun alcanzo dicir si esta merma de los díes de xelada ye por mor a un fechu pasaxeru, o si tendrá que ver col acalecimientu global, poro otros estudios, nesti casu serios, paez qu’atopen los mesmos resultaos pa otros llugares del mundu, y sí que lo achaquen al cambéu climáticu.

Postdata: Arriendes d’esti pequeñu análisis quise amplialo, y solicité datos a la AEMET, pa poder ver lo que socedió más p’atrás, y n’otres llocalidaes. La respuesta dexome ablucáu, los datos que solicitaba tenía que pagalos a preciu d'oru, ¡los datos que solicitaba suponíen más de 200 euros! De risa. Se supon qu’entre toos pagamos les actividaes de l’AEMET,  amás de que munchos datos so garraos por meteorólogos amateur que tienen casetes meteorolóxiques oficiales en casa. ¿Nun deberíen tar esos datos a disposición del ciudadanu?  Esta entruga pamidea que nun puede respondese con ciencia…

Comentarios